Nakatakdang lumahok sa Taipei Marathon 2025 ang marathon runner ng Romblon na si Jose Fabito Jr. sa darating na December 21, 2025 sa Chinese Taipei, Taiwan.
Ang naturang karera ay lalahukan ng libo-libong marathon runners mula sa iba’t ibang panig ng mundo, kung saan sasabak si Fabito sa 42-kilometer full marathon. Ito na ang ikalawang sunod na taon na siya ay sasali sa prestihiyosong paligsahan.
Noong nakaraang taon, nagtala si Fabito ng impresibong performance matapos siyang maging ikalawa sa lahat ng mga Pilipinong kalahok at ika-132 sa kabuuang humigit-kumulang 8,500 runners na sumali sa karera. Sa kanyang muling pagsabak ngayong taon, hangad niyang mahigitan ang kanyang naging resulta noong nakaraang edisyon ng marathon.
Bilang bahagi ng kanyang paghahanda, lumahok si Fabito sa 21K Run to Zero Race na ginanap sa Parqal, Pasay City noong November 16, 2025, at sumali rin siya sa 42K marathon sa La Paz, Tarlac noong November 23, 2025, kung saan siya ay nagkampeon sa parehong mga event.
Para sa nalalapit na karera sa Taipei, humiling si Jose Fabito Jr. ng panalangin para sa kanya at sa buong team na kasama niya, na aniya’y magsisilbing pinakamalaking lakas at proteksyon habang kanilang kinakatawan ang bansa at ang lalawigan ng Romblon sa pandaigdigang entablado ng marathon running.
