Pasado na sa Committee on Health ang panukalang batas ni Congressman Eleandro Jesus Madrona na naglalayong ilipat ang direct supervision ng Romblon Provincial Hospital (RPH) mula sa Pamahalaang Panlalawigan patungo sa Department of Health (DOH).
Ang House Bill No. 4312 ay nagtatangkang palakasin ang operasyon, pasilidad, at kalidad ng serbisyong medikal ng RPH sa Odiongan sa pamamagitan ng mas direktang pamamahala at sapat na suportang pinansyal at manpower mula sa DOH.
Sa pagdinig ng komite, inilahad ni Rep. Madrona ang hirap ng sitwasyon ng mga Romblomanon pagdating sa serbisyong pangkalusugan. Giit niya, Level 1 Hospitals at infirmaries pa lamang ang mayroon sa buong lalawigan, kaya’t madalas ay kinakailangang dalhin pa ang mga pasyente sa Maynila, isang biyahe na umaabot ng 8 hanggang 10 oras sa dagat.
“Most of the time, especially during bad weather, you could imagine what’s happening,” pahayag ni Madrona, sabay bigyang-diin ang kahalagahan ng mas maayos na pasilidad para sa mga taga-Romblon.
Ibinahagi rin ng kongresista na bukas ang Pamahalaang Panlalawigan na ibigay ang pamamahala ng RPH sa DOH upang mabigyan ito ng mas angkop na atensyon at suporta.
Ayon naman kay Dr. Christian Que, hepe ng RPH, malaking tulong ang panukala lalo na’t 75-bed capacity lamang ang ospital ngunit humahawak na ng higit 100 pasyenteng naka-confine.
“Malaking tulong po sa amin lalo na at maibigay ang tamang serbisyo kung matutulungan kami ng DOH sa pondo at manpower,” ani Que. Dagdag niya, dahil nasa isla, mahirap ang supply at mas challenging ang pagkuha ng mga doktor at nars na handang magserbisyo roon.
“Ganun kaimportante na matulungan kami, at maibalik sa DOH ang Provincial Hospital para sa ating mga pasyente,” dagdag pa niya.
Suportado rin ng Department of Health ang panukalang paglipat ng ospital sa kanilang direktang pamamahala.
