Itinanghal na bagong WBC Bantamweight Champion si Takuma Inoue, ang nakababatang kapatid ni Japanese Super Featherweight undisputed champion Naoya “The Monster” Inoue, matapos niyang talunin via unanimous decision ang kanyang kababayan na si Tenshin Nasukawa sa kanilang 12-round world title fight noong November 24, 2025 sa bagong tayong Toyota Arena sa Tokyo, Japan.
Sa pagbubukas ng laban, nakalamang agad si Nasukawa sa round 1 matapos makatama ng ilang solid punches na tila ikinagulat ni Inoue. Nagpatuloy ang pagiging mas mabilis at mas maliksi ni Nasukawa hanggang round 2. Ngunit pagpasok ng round 3, nagbago ang takbo ng laban at nagsimulang paboran si Inoue na naging mas agresibo at mas epektibo sa kanyang mga patama. Mas dumami ang kanyang solid punches at unti-unti nang nahirapan ang mas batang si Nasukawa na makasagot.
Habang tumatagal ang laban ay lalong lumitaw ang pagiging mas beterano ni Inoue. Ilang beses siyang nakapagmitsa ng short punches at uppercuts na nagpahirap kay Nasukawa na makakuha ng tamang rhythm. Pagtapos ng 12 rounds ay nagwagi si Inoue sa iskor na 116–112, 116–112, at 117–111, pawang unanimous decision ng mga hurado.
Itinuturing itong comeback win para kay Inoue matapos siyang talunin ni Seiya Tsutsumi noong October 2024 para sa WBA Bantamweight Title. Sa kasalukuyan, ang 29-anyos na si Inoue ay may rekord na 21 wins, 2 losses, 5 KOs.
Para naman kay Nasukawa, 27 anyos, ito ang kanyang unang world title fight. Taglay niya ngayon ang professional record na 7 wins, 1 loss, 2 KOs. Bago mag-focus sa boxing, naging undefeated siya sa mixed martial arts at sa professional kickboxing.
Pinag-agawan nina Inoue at Nasukawa ang bakanteng WBC Bantamweight Title na iniwan ni Junto Nakatani matapos itong lumipat sa Super Featherweight Division—kung saan naghihintay sa kanya si Naoya Inoue para sa isang potensyal na mega showdown.
Matagal nang inaabangan ng boxing fans ang Nakatani vs. Naoya Inoue bout. At ngayon na nasa parehong division na sila, tila mas nalalapit na itong maging realidad.
