Isinailalim na ng DOST-PAGASA sa Tropical Cyclone Wind Signal (TCWS) No. 1 ang lalawigan ng Romblon matapos maging ganap na bagyo ang binabantayang low-pressure area sa loob ng Philippine Area of Responsibility ngayong Lunes ng umaga, November 24.
Sa ulat ng PAGASA alas-5 ng umaga, ang Bagyong Verbana ay huling namataan sa layong 330 kilometro silangan ng Surigao City, Surigao del Norte. Taglay nito ang lakas ng hangin na 45 km/h malapit sa gitna at bugso na umaabot sa 55 km/h habang kumikilos pa-kanluran sa bilis na 30 km/h.
Bukod sa Romblon, nasa Signal No. 1 din ang southern portion ng Occidental Mindoro at Oriental Mindoro, gayundin ang mainland Masbate.
Nakataas rin ang Signal No. 1 sa mga sumusunod na lugar sa Visayas at Mindanao: central at southern Eastern Samar; central at southern Samar; Biliran; Leyte; Southern Leyte; central at southern Cebu; Bantayan at Camotes Islands; Bohol; northern Negros Occidental; northern Negros Oriental; Iloilo; Capiz; Aklan; Antique kabilang ang Caluya Islands; Guimaras; Dinagat Islands; Surigao del Norte kasama ang Siargao at Bucas Grande; northern Surigao del Sur; at northern Agusan del Norte.
Ayon sa PAGASA, maaaring maranasan ang malalakas na hangin sa loob ng susunod na 36 oras sa mga lugar na nasa ilalim ng Signal No. 1.
Patuloy na pinapayuhan ng gobyerno ang mga residente, lalo na sa mga mababang lugar at malapit sa daluyan ng tubig, na maging alerto sa posibleng pagbaha at pagguho ng lupa habang patuloy ang monitoring ng ahensya sa paggalaw ng bagyo.
