Opisyal nang inilunsad ng Department of Social Welfare and Development (DSWD) sa MIMAROPA ang Panahon ng Pagkilos: Philippine Community Resilience Project (PCRP) nitong Biyernes, Nobyembre 21, ang bagong community-driven development program na bagong programa ng Kapit-Bisig Laban sa Kahirapan-Comprehensive and Integrated Delivery of Social Services o KALAHI-CIDSS.
Layunin ng PCRP na palakasin ang kakayahan ng mga komunidad na harapin ang epekto ng kalamidad at pagbabago ng klima sa pamamagitan ng mga locally planned at risk-informed projects, kabilang ang maliliit na imprastrakturang pangkaligtasan, livelihood support, at disaster preparedness initiatives.
Ayon kay DSWD MIMAROPA OIC Benchie Gonzales, bibigyan nito ng mas malaking papel ang mga barangay at lokal na pamahalaan sa pag-identify, pamamahala, at pagpapatuloy ng mga proyektong makatutulong sa pagprotekta ng kabuhayan at kaligtasan ng mamamayan.
Ayon naman kay Engr. Raymond Libarra, Deputy Regional Program Manager ng KALAHI-CIDSS, ang Panahon ng Pagkilos ay nakatuon sa pagpapatatag ng mga komunidad sa harap ng mataas na exposure sa sakuna, kahinaan sa klima, kakulangan sa social services, at limitadong lokal na kapasidad sa preparedness at response. Tinutugunan umano ito sa pamamagitan ng community planning, pagsasanay, disaster risk reduction strategies, at pagpapatibay ng mekanismo ng komunidad para sa pag-aangkop at pagbangon.
Binigyang-diin din ng Libarra na dumaraan sa standard at community-based validation ang pagpili ng beneficiaries kaya’t hindi maaaring impluwensiyahan ng opisyal o sinumang personalidad. Dagdag ni Libarra, may matibay na track record ang CDD approach at suportado ito ng umiiral na polisiya at development partners, dahilan kung bakit ang Panahon ng Pagkilos ay itinuturing na pangmatagalang programa para sa resiliency, at hindi nakatali sa iisang administrasyon.
Kasama sa unang batch ng implementasyon ang mga bayan ng Odiongan, Ferrol, Looc, San Jose, Sta. Maria, San Agustin, Calatrava, San Andres, Romblon, Cajidiocan, San Fernando, at Magdiwang sa Romblon; mga bayan ng Abra de Ilog at Paluan sa Occidental Mindoro; Baco, Bulalacao at Mansalay sa Oriental Mindoro; at mga bayan ng Agutaya, Araceli, Bataraza, Culion, Cuyo, Magsaysay at Sofronio Española sa Palawan.
Tatanggap ang bawat LGU ng humigit-kumulang P50 milyon hanggang P70 milyon na mga proyekto sa loob ng tatlong taon, batay sa ihahaing proposal mula mismo sa kanilang mga komunidad.
Pinangunahan nina RD Gonzales, KALAHI-CIDSS OIC Deputy Program Manager Didith Bosoen, Romblon Governor Trina Firmalo-Fabic, Romblon Rep. Eleandro Jesus Madrona, at Occidental Mindoro Rep. Leody Tarriela ang paglulunsad na ginanap sa Pasay City.
