Maghihiling ng kumpletong kopya ng mga program of works mula sa Department of Public Works and Highways (DPWH) – Romblon District Engineering Office ang task force na binuo ni Governor Trina Firmalo-Fabic upang siyasatin at i-validate ang mga flood control projects sa lalawigan.
Sa panayam sa programang Yan Tayo ng DZMM Teleradyo, sinabi ng gobernador na mula Hulyo 2022 hanggang ngayong taon ay mahigit ₱5.8 bilyon ang inilaan para sa higit 80 flood control projects sa Romblon.
“By next week, magre-request po tayo sa DPWH para makakuha ng copy ng mga programs of works, then based on that we would evaluate those projects,” pahayag ni Firmalo-Fabic.
Kabilang sa tututukan ng imbestigasyon ang mga bumigay na mga flood control projects sa San Fernando at Looc na naiulat ng Romblon News Network.
Ayon sa gobernador, reklamo ng ilang residente na kulang sa bakal at madaling masira ang ilang proyekto, dahilan para magsagawa ng masusing technical inspection at hindi lamang visual o ocular na pagsusuri.
Inihayag pa ni Firmalo-Fabic na bahagi ng task force ang mga kinatawan mula sa civil society organizations (CSO) at non-government organizations upang matiyak ang transparency ng proseso.
“Everything we do must be based on facts. Hindi lang mag-ano lang ng accusations and allegations,” sabi ng gobernador, kasabay ng pahayag na hindi nangangahulugan ng agarang may problema ang pagsasagawa ng imbestigasyon.
Dagdag pa niya, kabilang sa kanilang pagsisiyasat ang pagtatanong sa DPWH kung ano ang naging batayan ng pagpili ng mga lugar na pinaglagyan ng flood control projects.
Batay sa datos na inilabas ni Pangulong Ferdinand Marcos Jr., ilan sa mga kontraktor na nakakuha ng proyekto sa Romblon ay kabilang sa Top 15 contractors na may pinakamaraming flood control projects sa buong bansa.
