Dumepensa si Romblon Lone District Representative Eleandro Jesus Madrona matapos lumabas sa social media ang isang larawan kung saan kasama niya sina Curlee at Sarah Discaya, na ibinahagi ng abogadong si Jesus Falcis.
Sa panayam ng Romblon News Network, sinabi ni Madrona na magkakilala lamang sila ng mga nasa larawan at walang anumang iligal na kinasasangkutan. Aniya, hindi dapat gawing isyu ang simpleng pagpapakuha ng larawan.
Si Sarah Discaya ay nauugnay sa mga proyekto ng Alpha & Omega Gen. Contractor & Development Corp., isang kumpanyang nakakuha sa mga flood control projects ng pamahalaan.
Batay sa website ng Department of Public Works and Highways (DPWH), ang mga proyekto ng kumpanya sa Romblon ay nakatuon sa konstruksyon ng mga kalsada, kabilang ang ilang bahagi ng bypass road sa bayan ng Odiongan na nagkakahalaga ng mahigit ₱238 milyon.
Kabilang din sa kanilang mga proyekto sa lalawigan ang pagtatayo ng mga kalsada sa Carabao Island at Tablas Island.
Samantala, iniutos ni Madrona sa Department of Public Works and Highways na magsagawa ng inspeksiyon at ayusin ang mga flood control projects sa Romblon na nasira ng nagdaang sama ng panahon.
