Nagplano ng mas maigting na pagtutulungan ang iba’t ibang ahensya ng gobyerno upang tugunan ang dumaraming kaso ng cyber attacks sa MIMAROPA, na nakapagtala ng pinakamaraming insidente sa buong bansa batay sa 2024 ICT Household Survey ng Philippine Statistics Authority (PSA).
Lumabas sa datos na 73.8% ng mga residente edad 10 pataas sa MIMAROPA ang nakaranas ng cyber incidents, kabilang ang SMS scams, hacking, cyberbullying, at phishing. Sa kabila nito, tanging 25.4% lamang ang may kaalaman sa cybersecurity at halos wala ring nagsusumbong ng mga kaso.
Ayon kay DICT MIMAROPA Regional Director Emmy Lou Delfin, palalakasin ang mga kampanya sa digital literacy, pagpapalawak ng internet access, at pagtutok sa kabataan. Samantala, hinikayat ng PNP MIMAROPA ang publiko na agad i-report ang mga insidente upang maging epektibo ang imbestigasyon at aksyon.
Dagdag pa ng mga opisyal, kailangan ang sama-samang pagkilos ng pamahalaan, lokal na media, at mga mamamayan upang mapalakas ang seguridad laban sa lumalalang banta ng cybercrime.
