Sinuspinde ng Malacañang ang pasok sa lahat ng antas ng klase at trabaho sa mga tanggapan ng gobyerno sa buong lalawigan ng Romblon sa Lunes, Setyembre 22, dahil sa inaasahang malalakas na ulan na dala ng Super Typhoon Nando at pinalakas na Habagat.
Batay sa Memorandum Circular No. 97 na nilagdaan ni Executive Secretary Lucas Bersamin, kabilang ang Romblon sa 29 probinsyang apektado ng suspensyon matapos irekomenda ng National Disaster Risk Reduction and Management Council (NDRRMC).
Tiniyak ng Malacañang na ang mga ahensiyang may kinalaman sa pangunahing serbisyo, kalusugan, disaster preparedness at response ay mananatiling operational upang hindi maantala ang serbisyong panlipunan, lalo na sa mga lugar na lubhang maaapektuhan ng bagyo.
Para naman sa mga empleyado ng gobyerno na hindi kasama sa mga critical agencies, maaaring ipatupad ang alternate work arrangements alinsunod sa umiiral na mga panuntunan.
Ayon sa PAGASA, inaasahan ang malalakas na pag-ulan at posibleng pagbaha at landslide sa mga mabababang lugar at bulubunduking bahagi ng Romblon habang patuloy na lumalapit ang bagyong Nando sa extreme northern Luzon.
Pinapayuhan ang mga lokal na pamahalaan at residente ng Romblon na manatiling mapagmatyag at sumunod sa mga anunsyo ng kanilang LGU at ng Provincial Disaster Risk Reduction and Management Office (PDRRMO).
