Lumabas sa pinakahuling datos ng 2024 Community-Based Monitoring System (CBMS) ng Philippine Statistics Authority (PSA) na mahigit 90 porsyento ng mga kabahayan sa buong lalawigan ng Romblon ay mayroon nang access sa kuryente.
Batay sa tala, halos lahat ng sambahayan sa probinsya ay konektado na sa suplay ng elektrisidad, na umabot sa 91 hanggang 99 porsyento noong 2024. Ang positibong pag-angat na ito ay nagpapakita ng mas malawak na distribusyon ng serbisyong pang-enerhiya sa mga bayan ng Romblon.
Ayon sa resulta ng CBMS na ibinahagi ni Senior Statistical Specialist Gerald Morada, kabuuang 79,623 kabahayan mula sa lahat ng 17 bayan ang naitala bilang respondents. Pinakamataas ang bilang sa Odiongan na may 12,956 households, sinundan ng bayan ng Romblon na may 10,425, habang ang pinakamababa ay sa Concepcion na may 1,035. Ang average household size sa lalawigan ay nasa 3.75.
Bukod sa kuryente, ipinakita rin ng datos ang pagtaas ng access ng mga kabahayan sa internet. Mula sa 61 hanggang 79 porsyento noong 2022, umabot na ito sa 80 porsyento sa karamihan ng mga bayan pagsapit ng 2024.
Sa usapin ng tubig at sanitasyon, higit 90 hanggang 99 porsyento ng mga kabahayan sa probinsya ang may improved source ng inuming tubig tulad ng gripo, protected spring, at water refilling stations. Samantala, bumaba naman ang bilang ng mga kabahayang gumagamit ng open defecation facility kumpara noong 2022.
Ipinakita rin sa ulat na mayroong 5,562 senior citizens sa Romblon na namumuhay nang mag-isa.
Sa sektor ng edukasyon, nananatiling mataas ang bilang ng kabataang edad 3 hanggang 24 na pumapasok sa paaralan, subalit kabilang pa rin sa mga dahilan ng hindi pag-aaral ang kakulangan ng interes, pagbubuntis, at pagtatrabaho.
Ayon sa PSA, ang mga datos mula sa CBMS ay magsisilbing batayan para sa mga lokal na pamahalaan sa Romblon sa pagbabalangkas ng mga polisiya at programang pangkaunlaran, kabilang ang pagtutok sa poverty alleviation, serbisyong panlipunan, at pagpapatupad ng mga proyektong nakabatay sa pangangailangan ng bawat komunidad.
