Naghanda ang Department of Social Welfare and Development (DSWD) ng halos 18,000 family food packs (FFPs) at mahigit 3,000 non-food items sa iba’t ibang warehouse sa lalawigan ng Romblon bilang tugon sa banta ng Bagyong Opong.
Ayon kay Melzandro Mariano, DSWD Disaster Risk Reduction and Management (DRRM) focal person, mahigit 9,409 FFPs at 1,651 non-food kits ang kasalukuyang nakaimbak sa SWADT Romblon Odiongan warehouse.
Bukod dito, nasa iba’t ibang munisipyo rin ang 8,269 FFPs at 1,468 non-food kits na na-prepositioned upang agad na maipamahagi sa mga residenteng maaapektuhan ng bagyo.
Kabilang sa mga non-food items ang hygiene kits, kumot, at iba pang gamit na magsisilbing pangunahing pangangailangan ng mga pamilyang maapektuhan.
Tiniyak ng DSWD na mananatili silang nakahanda para sa mabilis na pagtugon sakaling lumala ang epekto ng masamang panahon sa lalawigan.
