Bubuo ng isang konseho ang Pamahalaang Panlalawigan ng Romblon na tututok sa pagpapalakas ng digitalization ng mga serbisyo, bilang suporta sa mga programa ng Department of Information and Communications Technology (DICT).
Ibinahagi ni Governor Trina Firmalo-Fabic ang plano sa isinagawang MIMAROPA ICT Roadshow 2025 sa Romblon State University nitong Biyernes, Agosto 22.
Ayon sa kanya, malaki ang maitutulong ng teknolohiya hindi lamang sa pamahalaan kundi maging sa kabataan, pribadong sektor, at bawat pamilyang Romblomanon.
Isa sa mga pangunahing tututukan ng konseho ang pagpapalawak ng paggamit ng eLGU system ng DICT, kung saan online na ang magiging proseso ng pagkuha ng mga permit at iba pang dokumento sa mga lokal na pamahalaan.
Batay sa huling ulat ng DICT MIMAROPA, nasa 13 lokal na pamahalaan sa Romblon ang gumagamit na ng sistemang ito.
Dagdag pa rito, pinag-aaralan din ng pamahalaang panlalawigan ang posibilidad ng pagtatayo ng isang Digital Transformation Center sa bago nitong sub-office sa Tablas, na nakatakdang buksan sa susunod na buwan. Layunin ng sentrong ito na magsilbing hub ng mga inisyatibong pangteknolohiya sa lalawigan at tulungan ang mga mamamayan at iba’t ibang sektor sa pag-angkop sa makabagong digital solutions.
Inihayag ni Fabic, na dating alkalde ng Odiongan, na siya ay kaagapay na ng DICT sa kanilang mga programa sa Romblon para sa pag-papaunlad ng Odiongan at ng lalawigan ng Romblon.
