Pormal nang inilunsad ng Department of Science and Technology (DOST) MIMAROPA, katuwang ang Chesed Center for Community Development Inc., ang Romblon iHub.
Layunin ng inisyatiba na magsilbing pre-incubation platform para sa mga startups, estudyante, mananaliksik, at micro, small, and medium enterprises (MSMEs) upang makabuo ng mga makabagong solusyon, ideya sa negosyo, at teknolohiya na angkop sa merkado at pamayanan.
Pinangunahan ni DOST Secretary Renato Solidum Jr. ang paglulunsad kasama sina Engr. Jerry Mercado, OIC-Regional Director ng DOST-MIMAROPA; at Engr. Sancho Mabborang, Undersecretary for Regional Operations ng DOST.
Matatagpuan ang iHub sa Provincial Science and Technology Office sa Romblon.
Sa pamamagitan ng opisina ng DOST sa lalawigan, magpapatuloy ang iHub sa pagbibigay-suporta sa paglago ng mga lokal na innovator at negosyante bilang bahagi ng pagtutok ng DOST-MIMAROPA sa inobasyon at community-led development.
Hinikayat naman ni Sec. Solidum ang kabataan at mga innovator na gamitin ang bagong pasilidad upang subukan at paunlarin ang kanilang mga ideya.
“Kung may naiisip kayong idea, maliit man o malaki, puwede kayong magtungo doon para subukan at pagtrabahuan. Ang pasilidad na ito ay parang creative playground para sa mga utak na mahilig magtanong ng ‘Paano kaya kung?’ at may tapang na subukan ang sagot,” pahayag ni Solidum.
Dagdag ng kalihim, ang iHub ang lugar na magpapatingkad ng ideya ng mga researchers tungo sa realidad.
Bukas ang iHub mula Lunes hanggang Biyernes, mula alas-8 ng umaga hanggang alas-5 ng hapon.
