Napabilang sa Group A ang National Women’s Football Team ng Pilipinas (Filipinas) sa isinagawang draw noong Hulyo 29, 2025 para sa AFC Women’s Asian Cup 2026 na gaganapin sa Australia mula Marso 1–21, 2026.
Ang AFC Women’s Asian Cup ay nagsisilbing qualifying tournament para sa mga bansang nasa Asian region patungo sa FIFA Women’s World Cup 2027 na gaganapin sa Brazil.
Makakasama ng Filipinas sa Group A ang mga koponan mula sa Iran, South Korea, at ang host country na Australia. Ang Group A ay itinuturing na isa sa mga pinakakompetitibong grupo sa torneo. Samantala, nasa Group B ang North Korea, China, Bangladesh, at Uzbekistan. Ang Group C naman ay binubuo ng Japan, India, Vietnam, at Chinese Taipei.
Ang dalawang nangungunang koponan sa bawat grupo ay uusad sa quarterfinals, kasama ang dalawang best third-placers mula sa group stage. May anim na slots na nakalaan para sa Asian region para sa FIFA Women’s World Cup 2027.
Noong 2023, nakarating ang Filipinas sa semifinals ng AFC Women’s Asian Cup, na naging daan upang makalahok sila sa FIFA Women’s World Cup sa unang pagkakataon.
Sa kasalukuyan, patuloy na pinaghahandaan ni Coach Mark Toscaro ang pagpili ng opisyal na line-up ng Filipinas para sa nalalapit na torneo. Ayon sa kanya, layunin ng coaching staff na maging handa at nasa maayos na kondisyon ang mga manlalaro bago magsimula ang kompetisyon.
