Pormal nang inihain ng Tablas Island Electric Cooperative, Inc. (TIELCO) at SUWECO Tablas Energy Corporation (STEC) sa Energy Regulatory Commission (ERC) ang kanilang kahilingan na payagan nang ipagamit ang bagong tayong diesel power plant ng STEC sa bayan ng San Agustin, Romblon.
Ayon sa TIELCO, ang hakbang ay bahagi ng pagsisikap na tugunan ang kakulangan sa suplay ng kuryente sa buong isla ng Tablas, na kasalukuyang umaabot na sa lampas sa kanilang approved contracted generating capacity na 9.375 megawatts.
Dahil sa patuloy na paglaki ng populasyon at bilang ng establisimyento sa isla, sinabi ng kooperatiba na hindi na sapat ang kasalukuyang suplay.
Sa ganitong konteksto, iminungkahi nila na simulan na ang commercial operations ng bagong planta sa San Agustin na may kakayahang makapag-generate ng karagdagang 5.3 MW.
Sinabi ng STEC na ang kanilang planta sa San Agustin ay handa na umano para sa commercial operation.
Bukod sa planta sa San Agustin, may mga kaparehong pasilidad din na itatayo sa mga bayan ng Alcantara at Santa Fe, na may layuning palakasin pa ang power reliability sa iba’t ibang bahagi ng Tablas Island.
Nilinaw naman ng TIELCO at SUWECO na ang paggamit ng planta ay hindi magreresulta sa dagdag na singil sa mga member-consumer ng kooperatiba.
Itinakda ng ERC ang public hearing ukol sa naturang kahilingan sa darating na August 5 at 12, kung saan inaasahan ang pagdalo ng stakeholders, kabilang ang mga opisyal ng lokal na pamahalaan, at kinatawan mula sa sektor ng enerhiya.
