Pormal na nagpasa ng isang position letter si Konsehal Miguel Gabriel Montojo ng Bayan ng Romblon bilang pagtutol sa panukalang pagtaas ng passenger terminal fee sa Batangas Port mula ₱30 hanggang ₱100.
Sa kanyang opisyal na dokumento na isinumite ngayong araw, July 10, sa Philippine Ports Authority, binigyang-diin ni Montojo na ang mahigit 200 porsiyentong pagtaas ay “labis, hindi makatarungan, at kontra-komyuter,” at hindi makatarungan lalo na para sa mga biyaherong mahihirap mula sa MIMAROPA na umaasa sa pantalan bilang pangunahing gateway patungong Luzon.
“Ang ipinagmamalaking ‘high standards’ ng operator ay hindi naman totoo sa aktwal na karanasan ng mga pasahero,” aniya. [A far cry from the seamless mobility one would expect if “high standards” truly exist]
Sa kanyang sulat, binanggit ni Montojo ang ilang isyu sa serbisyo ng Batangas Port tulad ng maruruming comfort rooms, hindi gumaganang libreng Wi-Fi, limitado at hindi maaasahang shuttle service, at mga ulat ng bastos o korap na pag-uugali ng ilang tauhan ng pantalan.
Hinimok din niya ang Philippine Ports Authority (PPA) at Asian Terminals Inc.-Batangas (ATIB) na muling pag-aralan ang panukala at ikonsidera ang isang makatarungan at unti-unting pagtaas, halimbawa ay ₱45 hanggang ₱50, na dapat lamang ipatupad kasabay ng aktuwal na pagpapabuti ng serbisyo.
“The people of Romblon and MIMAROPA are not against development or reasonable fees. The proposed PHP100 terminal fee at Batangas Port, under current conditions, feels like an abuse of monopoly power and a disregard of the commuting public’s welfare. It asks passengers to bankroll “world-class” services that they have yet to experience for themselves,” ayon pa sa position letter ng konsehal.
Giit ni Montojo, tungkulin ng pamahalaan at ng operator na tiyakin na ang anumang pagtaas ng bayarin ay patas, makatwiran, at hindi magiging dagdag na pasanin sa mga ordinaryong pasahero, partikular ang mga estudyante, manggagawa, at maliliit na negosyante mula sa mga probinsya ng MIMAROPA.
