Sa pagsisimula ng ika-20 Kongreso, agad na naghain si Romblon Lone District Representative Eleandro Jesus F. Madrona ng serye ng mga panukalang batas na naglalayong kilalanin at paunlarin ang mga natatanging destinasyon sa lalawigan bilang mga opisyal na tourism at ecotourism sites.
Layon ng mga hakbang na ito na mapalakas ang industriya ng turismo sa Romblon sa pamamagitan ng mas organisado at suportadong promosyon, imprastruktura, at pamamahala. Ilan sa mga panukalang ito ay dati nang inihain noong ika-19 na Kongreso ngunit hindi naipasa, kaya muling isinulong ngayong bagong sesyon ng batasan.
Kabilang sa mga panukala ay ang pagkilala sa Suba Cove sa Corcuera bilang isang ecotourism destination. Matatagpuan sa Barangays San Roque, Mangansag, at Mabini, kilala ang Suba Cove sa likas nitong ganda at mala-paraisong tanawin na patok sa mga adventure at nature lovers.
Kasama rin sa isinusulong ni Madrona ang pagsasama ng Siki it Elepante rock formation sa Barangay Labnig, Corcuera sa listahan ng mga tourism sites. Ang Cotta de San Jose ruins naman ay isa ring bahagi ng panukalang batas.
Hindi rin nalimutan ng kongresista ang mga baybayin at beach destinations sa kanyang distrito. Itinutulak niyang kilalanin bilang tourism destinations ang Payayasog Beach sa Barangay Mangansag at Colong-Colong Beach—parehong nasa Corcuera—gayundin ang Binucot Beach sa Ferrol bilang isang ecotourism destination. Kilala ang mga ito sa mala-kristal na tubig, white sand, at kakaibang biodiversity.
Isinusulong rin ni Madrona ang pagkilala sa buong bayan ng San Jose (Isla de Carabao) at Santa Fe bilang tourism destinations, at ang San Andres bilang isang tourism development area.
Ang Looc Bay Area sa bayan ng Looc ay isinama rin bilang isang ecotourism destination. Kilala ito sa Looc Marine Sanctuary na isa sa mga best-managed marine protected areas sa bansa, at sinisikap ng panukala na mapanatili ang marine biodiversity nito habang isinusulong ang sustainable tourism.
Bukod sa kalikasan at kasaysayan, hindi rin nakaligtaan ang pagpapahalaga sa kabayanihan. Inihain ni Madrona ang panukalang batas na magtatatag ng Battle of the Sibuyan Sea Memorial Shrine sa bayan ng Cajidiocan, bilang pagkilala sa makasaysayang labanan noong World War II
Si Congressman Madrona ang nahalal na chairman ng House Committee on Tourism para sa 20th congress.
Inaasahang tatalakayin ang mga panukalang batas sa mga susunod na sesyon ng Kongreso.
