Mahigpit nang ipinagbabawal ng Pamahalaang Panlalawigan ng Romblon ang paglalagay ng pangalan, mukha, o kahit inisyal ng mga politiko sa mga tarpulin, signage, o kagamitan ng gobyerno.
Batay sa Executive Order No. 1 na pinirmahan ni Governor Trina Firmalo-Fabic, tanging opisyal na detalye na lamang ng proyekto ang dapat makita sa mga signages gaya ng pangalan ng proyekto, lokasyon, halaga, pinagmulan ng pondo, kontratistang nagpapatupad, petsa ng implementasyon, at ang opisyal na logo ng pamahalaang panlalawigan.
Ayon sa kautusan ng gobernador, ang mga signages dapat ay susundin ang regular na layout na sinasabi ng Commission on Audit at wala sa partisan format.
Bilang bahagi rin ng kautusan, hindi na rin papayagan ang paglalagay ng pangalan o larawan ng mga politiko sa mga kagamitan ng pamahalaang panlalawigan tulad ng mga ambulansya, speedboats, firetrucks, service vehicles, at iba pa.
Sakop rin ng pagbabawal ang relief goods — bawal na rin ang mga pangalan, mukha, at inisyal ng politiko sa mga packaging o container ng tulong mula sa pamahalaang panlalawigan.
Layunin ng Executive Order na itaguyod ang pagpapatupad ng “good governance” sa bagong administrasyon.
