Muling pinagana ng Philippine Coast Guard (PCG) ang anim na light stations sa lalawigan ng Romblon na matagal nang hindi gumagana, ayon sa ulat ng Maritime Safety Services Unit ng PCG Southern Tagalog.
Kabilang sa mga naayos at pinailawang muli ang mga light stations sa Corcuera, Gorda sa Calatrava, Jetty Red at Calabogo sa bayan ng Romblon, Malbog sa Looc, at Calatong Hill sa Santa Fe. Isinagawa ng PCG ang pagkukumpuni at pag-iikot sa loob ng limang araw.
Sa Calatong Hill light station, kinailangan pang akyatin ng mga tauhan ng PCG ang matarik na bahagi ng burol upang maibalik ang ilaw. Nabatid na halos tatlong taon na itong hindi gumagana.
Sa muling pagpapailaw ng mga light stations na ito, tumaas sa 94 porsyento ang operational light stations sa buong Southern Tagalog region.
Ayon sa PCG, malaking tulong ang mga ito para sa mga mangingisda at naglalayag sa karagatan ng Romblon upang mas ligtas at mas madali ang kanilang biyahe.
