Sa darating na Linggo, July 20, 2025, muling lalaban ang 46-anyos na boxing legend at dating 8-division world champion Manny “Pacman” Pacquiao. Makakaharap niya ang kasalukuyang WBC Welterweight Champion na si Mario Barrios sa MGM Grand Garden Arena, Las Vegas. Kung mananalo si Pacquiao, siya ang magiging pinakamatandang kampeon sa Welterweight Division.
Si Mario Barrios ay 30 taong gulang, Mexican-American boxer na may kartadang 29 panalo, 2 talo, 1 draw at 18 knockouts. Nagsimula siya bilang pro noong 2013. Taong 2018, nakuha niya ang kanyang unang world title matapos talunin si Jose Roman para sa WBA Intercontinental Welterweight belt, naidepensa niya laban kina Richard Zamora at Juan Jose Velasco.
Noong 2019, napanalunan ni Barrios ang WBA (Regular) Super Lightweight title laban kay Batyr Akhmedov at naidepensa ito kay Ryan Karl. Pagkatapos magtala ng 26–0 na record, sunod-sunod siyang natalo kina Gervonta “Tank” Davis (2021) at Keith Thurman (2022).
Bumangon si Barrios noong 2023 sa pamamagitan ng panalo laban kay Jovanie Santiago para sa WBC Continental Americas Welterweight title. Sinundan ito ng pagkapanalo ng WBC Interim Welterweight belt kontra Yordenis Ugas noong September 2023, at naidepensa niya ito laban kay Fabian Maidana noong May 2024.
Noong May 27, 2024, matapos ideklarang “champion in recess” si Terrence Crawford, itinaas ng WBC si Barrios bilang full WBC Welterweight Champion. Huli siyang lumaban noong November 15, 2024 laban kay Abel Ramos, kung saan nagtapos ang laban sa draw kaya nanatili sa kanya ang titulo.
