Mariing tinututulan ng Pamahalaang Panlalawigan ng Romblon ang panukalang dagdag-singil sa passenger terminal fee (PTF) sa Batangas Port mula ₱30 tungong ₱100.
Sa isang position paper na ipinadala ni Governor Trina Firmalo-Fabic sa Philippine Ports Authority (PPA) nitong July 11, iginiit ng Pamahalaang Panlalawigan na ang Batangas Port ay “not a luxury but a lifeline” para sa mga taga-Romblon. Nakasalalay dito ang kalakalan, pag-aaral, serbisyong medikal, at ang pananatiling konektado ng mga pamilya sa pagitan ng mga isla.
Tinawag ng lalawigan ang 233% na umento na “patently excessive” at nagbabala itong magpapabigat lalo sa mga ordinaryong manggagawa, mangingisda, magsasaka, estudyante, at mahihirap na residente.
Binanggit ng Pamahalaang Panlalawigan na ayon sa Philippine Statistics Authority, 32.3% ng populasyon sa Romblon ay nasa poverty incidence—isang mahalagang konteksto sa usapin ng dagdag na singil.
“For Romblomanons, this is not a small expense. It is a significant burden, particularly for families with limited disposable incomes,” ayon sa position paper.
Hiniling din ng Pamahalaang Panlalawigan sa PPA na kung talagang kailangan ang pagtaas, ito ay dapat minimal at makatwiran, at malinaw na magreresulta sa “measurable and verifiable” na pagbuti ng serbisyo—lalo na para sa mga biyaheng Batangas-Romblon.
“We also emphasize the need for real, tangible, and directly felt improvements in service quality for Batangas-Romblon passengers, who comprise a significant share of the port’s revenue base,” ayon sa sulat ng gobernador.
Ang dokumento ay naipadala na sa PPA, Port Manager ng Batangas Port, at sa mga kinatawan ng terminal management sa Romblon at Tablas Island.
