Isang malinaw at makapangyarihang mensahe ang ipinahayag ng mga mamamayan ng Sibuyan Island, Romblon sa nakaraang halalan: mariin nilang tinututulan ang pagmimina. Ang kanilang boto pabor sa mga kandidatong tahasang lumalaban sa mining sa isla ay patunay ng kanilang pagkakaisa at paninindigan para sa kalikasan. Sa halip na magpadala sa mga pangako ng trabaho o umasa sa umano’y pag-unlad mula sa pagmimina, pinili ng mga Sibuyanon ang landas ng proteksyon at pangangalaga sa kanilang likas na yaman.
Sa kabila ng matinding pananakot, pangakong kaunlaran, at mapanlinlang na kampanya ng ilang mining companies at pro-mining na grupo, nanatiling matatag ang mga Sibuyanon. Mula sa mga kilos-protesta noong 2023 at bago pa man, hanggang sa mismong araw ng halalan, ipinakita nila ang kanilang tapang at determinasyon. Ang naging resulta ng eleksyon ay hindi lamang simpleng talaan ng boto—ito ay salamin ng puso at damdamin ng sambayanan: isang malinaw na “HINDI” sa malawakang pagmimina sa kanilang isla.
Isa sa pinakatampok na tagumpay ay ang pagkapanalo ni Trina Firmalo-Fabic, isang kilalang tagapagsulong ng adbokasiyang anti-mining at pro-environment. Panalo sya sa tatlong bayan ng Sibuyan—San Fernando, Cajidiocan, at Magdiwang, laban sa kanyang kalaban sa pagka-gobernador na si incumbent governor Jose ‘Otik’ Riano.
Sa San Fernando, isang karaniwang mamamayan ngunit matapang na tagapagtanggol ng kalikasan ang nahalal bilang mayor: si Nanding Marin. Siya ang parehong Nanding na noong 2023 ay walang takot na humarang sa mga malalaking truck ng isang mining company bilang bahagi ng kilos-protesta ng mga mamamayan. Sa kanyang tagumpay, ipinakita ng mga taga-San Fernando na mas pinipili nila ang lider na tunay na kaagapay nila sa laban para sa kalikasan.
Ang boto ng Sibuyan ay hindi lamang pagpili ng kandidato, kundi deklarasyon ng kanilang pagmamahal at malasakit sa isla. Nais nilang mapanatili ang mga kabundukan, kagubatan, at karagatan—hindi lamang para sa kasalukuyang henerasyon kundi para sa mga susunod pa. Ang Sibuyan, na tinaguriang “Galápagos of Asia” dahil sa natatanging biodiversity, ay isang pambansang yaman na hindi dapat sirain ng ganid na interes.
Hindi ito karaniwang eleksyon. Isa itong tagumpay ng damdaming makabayan. Isa itong paninindigan para sa karapatan ng kalikasan, at para sa karapatan ng mga mamamayan na mabuhay sa isang malinis at ligtas na kapaligiran.
Nawa’y magsilbing inspirasyon ang Sibuyan sa buong Pilipinas. Ang boto ay hindi lamang papel na isinusubo sa makina—ito ay tinig ng prinsipyo. Sa kaso ng Sibuyan, ito ay tinig ng buhay.
Sibuyan, saludo kami sa inyong paninindigan.
