Sa gitna ng lumalalang tensyon sa pagitan ng Pilipinas at Tsina, isang nakakabahalang rebelasyon ang lumitaw mula sa isang committee hearing na pinangunahan ni Senador Francis Tolentino. Ayon sa kanyang mga natuklasan, may mga Filipino vloggers na diumano’y binabayaran ng mga pro-China entities upang maglabas ng content na pabor sa interes ng Tsina—kahit pa ito’y taliwas sa katotohanan at sa interes ng sambayanang Pilipino.
Kung totoo ang mga ito, hindi lamang ito usapin ng fake news. Isa itong seryosong banta sa soberanya ng ating bansa. Ang paggamit sa social media bilang kasangkapan ng banyagang kapangyarihan upang impluwensyahan ang opinyon ng mga Pilipino ay malinaw na anyo ng panghihimasok sa ating demokrasya.
Hindi na bago ang taktikang ito. Sa ibang bansa gaya ng Estados Unidos at ilang bahagi ng Europa, matagal nang isyu ang foreign interference sa politika at media. Ngunit ngayon, tila tayo na mismo ang bagong target. At ang mas masaklap, may mga kababayan tayong tila walang pakialam basta’t may perang kapalit.
Mahalagang kilalanin ang ginagampanang papel ni Senador Tolentino sa pagbubunyag ng isyung ito. Sa panahong laganap ang disimpormasyon at hindi pagkakaunawaan sa mga isyung pan-teritoryo, kailangang malaman ng bawat Pilipino kung sino ang tunay na nagtatanggol sa bansa at sino ang tila nagiging instrumento ng dayuhang kapangyarihan.
Ngunit hindi sapat ang paglalantad lamang. Kailangan itong sundan ng malinaw at matibay na aksyon. Dapat magkaroon ng imbestigasyon, mga kaukulang batas, at aktibong pagsugpo sa ganitong mga gawaing subersibo. Hindi pwedeng hayaan na ang katotohanan ay patuloy na baluktutin, at ang kabataan ay malason ng mga pekeng naratibo sa TikTok, YouTube, at Facebook.
Kung hindi natin ito papatulan ngayon, kailan pa? Bagamat may mga netizen na nagpapasalamat kay Senator Tolentino sa pagsisiwalat ng isyung ito, may ilan ding nagtatanong kung bakit ngayon lang niya ito ibinunyag, gayong matagal na raw itong nangyayari. Tahimik umano siya noon—dahil ba ito sa pagiging pro-China ng dating Pangulong Duterte na kanya ring suportado?
Ang pakikibaka laban sa disimpormasyon ay hindi lamang laban sa kasinungalingan. Isa itong laban para sa ating dangal, ating soberanya, at sa kinabukasan ng ating bansa.
