Pinasinayaan ngayong Biyernes, Abril 4, ang bagong gusali ng Concepcion Municipal Police Station sa isla ng Sibale, Romblon. Pinangunahan ni PBGEN Roger . Quesada, Regional Director ng Police Regional Office MIMAROPA, at PCOL Rexton Sawi, Provincial Director ng Romblon Police Provincial Office (PPO), ang opisyal na pagbubukas ng istasyon.
Dinaluhan din ng mga lokal na opisyal, kabilang sina Governor Jose Riano, Congressman Eleandro Madrona, at Vice Governor Armando Gutierrez, ang seremonya bilang suporta sa mas pinaigting na seguridad sa isla.
Ayon sa Romblon PPO, ang bagong gusali ay sumisimbolo sa patuloy na pagsusumikap ng pamahalaan para sa mas ligtas at organisadong komunidad sa Sibale.
Ito ay isang dalawang palapag na gusali na may covered roof deck, matibay na roofing at structural sheet metals, malalawak na glass windows at entry doors, maayos na pintura, at ground floor ramps para sa mga Persons with Disabilities (PWDs).
Inaasahang mas mapapahusay ng bagong pasilidad ang mga serbisyo ng pulisya sa isla, na magbibigay ng mas mabilis at epektibong pagtugon sa seguridad at kapayapaan sa bayan ng Concepcion.
