Patuloy na nararanasan ang kakulangan ng karne ng baboy sa Odiongan Public Market, Odiongan, Romblon, mahigit isang linggo matapos salubungin ng mga residente ang Bagong Taon.
Kinumpirma ni Sangguniang Bayan Member Ricmel Falqueza, chair ng Committee on Agriculture, na ito’y nagsimula noong unang linggo ng Enero. Ayon sa mga negosyante sa palengke, ang kakulangan ay dulot ng patuloy na pag-export ng mga baboy mula Romblon patungo sa ibang probinsya, kung saan mas mataas ang presyo ng mga ito.
Inihayag ng mga nag-aalaga ng baboy na mas pinipili nilang ibenta sa labas ng probinsya upang mabawi ang mataas na gastusin sa pagpapalaki ng baboy, lalo na ang mahal ng feeds at iba pang kagamitan.
Upang tugunan ang problema, nagpatawag ang Municipal Enterprise and Economic Development Office ng stakeholders meeting noong Enero 13. Isa sa mga inaasahang hakbang ay ang paghingi sa pamahalaang panlalawigan ng moratorium o pansamantalang pagbabawal sa pag-export ng baboy.
Ang hakbang na ito ay kritikal din bilang paghahanda para sa nalalapit na Provincial Athletic Meet sa Odiongan, kung saan inaasahang dadagsa ang mga bisita mula sa iba’t ibang bayan.
