Iniulat ng Provincial Disaster Risk Reduction and Management Office (PDRRMO) na walang naitalang casualty sa buong lalawigan ng Romblon sa kabila ng pananalasa ng Severe Tropical Storm Kristine.
Ayon kay Major Joseph Menorca, bagong PDRRM Officer ng Romblon, bagama't nagkaroon ng maraming landslide sa ilang bahagi ng probinsya, walang nasawi sa kalamidad.
Walong bayan sa Romblon ang nagpatupad ng pre-emptive evacuation, na nagresulta sa paglikas ng 244 na pamilya o katumbas ng 786 indibidwal. Ito ay ginawa upang maiwasan ang mga panganib ng pagbaha, pagguho ng lupa, at storm surge. Subalit, dahil hindi direktang tinamaan ng bagyo ang probinsya, kakaunti lamang ang inilikas.
Inaasahan ni Menorca na kung gaganda na ang panahon ngayong Biyernes, makakabalik na sa kanilang mga tahanan ang mga evacuees. Pinagtitibay din ng gobyerno, katuwang ang mga lokal na pamahalaan at ang Department of Social Welfare and Development (DSWD), na aabot ang tulong sa lahat ng naapektuhang residente.
Bagama't may ilang naitalang pinsala sa mga bahay at pagkasira ng mga puno, malaking bagay para sa probinsya na walang nasawi sa kabila ng epekto ni Kristine. Mayroon ding ilang lugar na patuloy pang nakakaranas ng interruption ng suplay ng tubig at kuryente, ngunit patuloy itong inaayos ng Romblon Electric Cooperative at Tablas Island Electric Cooperative.
Patuloy naman ang monitoring ng PDRRMO upang masiguro na ang lahat ng nangangailangan ay maaabutan ng tulong.
