Diretso kulungan ang isang suspek na di umano ay nanaksak ng isang bakasyunistang pulis sa isang sayawan sa Barangay Bonlao, Alcantara, Romblon madaling araw ng Lunes.
Kinilala ng Alcantara Municipal Police Station ang suspek ay isang 28 anyos na residente ng nasabing barangay.
Sa imbestigasyon ng pulisya, sumasayaw ang pulis na si Pat Richard Omnos Catigmot na naka-assign sa PNP Aviation Security Group sa isang sayawan kasama ang kanyang mga bakaibigan nang biglang nagkagulo.
Habang nagkakagulo ay nakaramdam nalamang ang biktimang pulis ng tila may sumaksak sa kanyang likod. Agad niyang inaresto ang suspek at nagpakilala na siya ay isang pulis.
Dinala ng iba pang pulis ang suspek sa Alcantara Municipal Police Station para ikulong habang ang biktima naman ay isinugod sa Don Modesto Formilleza Sr. Memorial Hospital sa Looc, Romblon para magpagamot.
Nakuha naman sa crime scene ang patalim na ginamit umano sa pananaksak. Mahaharap ito sa kasong attempted homicide.
Samantala, itinanggi ng pamilya ng suspek sa Romblon News Network na nagawa ng kanilang kamag-anak ang krimen. Napagbintangan lamang umano ito dahil ito ang taong nakita ng biktima na nasa kanyang likuran.
