Aabot sa 40 na kababaihan sa probinsya ng Romblon ang binigyan ng toolkits ng Technical Education And Skills Development Authority o TESDA nitong March 14.
Ang pamamahagi ng toolkits ng TESDA ay nataon sa pagdiriwang ng bayan ng Odiongan sa Women's Month kung saan nagtipon-tipon ang halos 300 kababaihan mula sa 25 barangay ng bayan.
Ayon kay TESDA Provincial Director Engr. Lynette Gatarin, ang mga nabigyan ng toolkits, na binubuo ng electric oven at mixer, ay nagtapos ng Bread and Pastry Production NC II noong nakaraang taon sa ilalim ng Special Training for Employment Program ng ahensya sa tulong ng Romblon Training Center.
Sinabi ni Gatarin na inaasahan ng kanilang ahensya na magamit ng mga benepisyaryong kakabihan sa pagpapalago o pagsisimula ng kanilang negosyo sa kani-kanilang lugar ang mga bagong kagamitang ipinagkaloob sa kanila para patunayan ang kanilang kakayahan, kahawig sa tema ng 2024 National Women's Month celebration ngayong taon na “Lipunang Patas sa Bagong Pilipinas: Kakayahan ng Kababaihan, Patutunayan!”
Sa parehong aktibidad, ibinahagi ni Dr. Elemelyn Montoya, Vice President for Academic Affiars ng Romblon State University, na layunin talaga ng Odiongan Women Council na maging pantay-pantay ang opurtunidad sa mga kababaihan sa bayan.
“Ipakita natin sa buong mundo ngayong Women's Month na ang mga babae ay limitado ang kayang gawin. Paalala sa lahat ang Women's Month na ang laban natin sa Gender Equality ay dapat nating suportahan,” pahayag nito.
Ang 40 na nagsipagtapos sa kurso ng TESDA ay kabilang sa 1,817 na indibidwal na natulungan ng ahensyang makapagtapos ng pagsasanay sa iba't ibang kurso noong 2023.
