Isang lalaki ang sugatan sa nangyaring gulo sa harap ng isang tindahan sa Barangay Dapawan, Odiongan, Romblon bago mag hating gabi nitong Martes.
Ang insidente ay nakunan ng CCTV ng tindahan kung saan ang biktimang si Michael Tambalque, 44, ay nakikipag-inuman sa suspek na si Michael Mazo, 38.
Nagkaroon ng pagtatalo ang dalawa na nauwi sa mainit na komprontasyon.
Hawak-hawak ang bote ng beer, bigla nalang pinalo ng suspek ito sa ulo ng biktima at ginamit na panaksak ang nabasag nitong mga parte.
Nagtamo ng sugat sa iba't ibang bahagi ng katawan ang biktima na agad namang isinugod sa ospital.
Itinuro naman ang suspek ng mga witness sa lugar kaya ito agad na nadakip ng mga rumespondeng kapulisan. Nakakulong na ito at mahaharap sa kasong Frustrated Homicide.
