Wala nang nakikitang cocolisap ang mga tauhan ng Philippine Coconut Authority sa probinsya ng Romblon simula pa taong 2019 dahilan para ituring na cocolisap-free na ang probinsya.
Ito ang naging pahayag ni Coconut Development Office Donna Mycah Gaa sa ginanap na Kapihan sa PIA Romblon nitong Huwebes.
“Sa loob ng ilang taon simula 2017 hanggang 2019 ay nagkaroon tayo ng ground checking at nagkaroon ng leaf pruning at spraying. Pamamaraan ito ng PCA para makontrol ito. Sa pagkakaalam ko, 90% ang nasagip natin at ang iba naman ay naputol. Sa ngayon, wala na pero tuloy-tuloy ‘yung ground checking natin doon sa area,” ayon kay Gaa.
Taong 2017 nang tumama ang cocolisap sa probinsya kung saan naapektuhan nito ang ilang barangay sa bayan ng Calatrava at San Agustin.
Sinabi ni Gaa na halos 400,000 na puno ng niyog ang naapektuhan ng cocolisap sa probinsya bago ito makontrol noong 2019.
