Nasawi sa pananaga ang isang lalaki sa bayan ng Odiongan, Romblon matapos itong tagain ng lasing na tricycle driver na nakaalitan nito sa isang waiting shed nitong Linggo, June 11.
Sa ulat ng Odiongan Municipal Police Station, ang biktimang si Isidro Medina ay nakatambay sa isang waiting shed sa Sitio Sampaguita sa Barangay Budiong nang dumating ang tricycle driver.
Bigla umano itong lumiko sa harap ng waiting shed na naging dahilan para magalit ang biktima.
Nagkaroon umano ang pagtatalo ang dalawa hanggang sa bumaba ng tricycle ang suspek at binunot ang bolo na pagmamay-ari ng biktima at tinaga ito.
Humandusay ang biktima na may tama sa leeg.
Sinubukan pa itong dalhin sa ospital nang mga rumespondeng tauhan ng Municipal Disaster Risk Reduction and Management Office ngunit idineklara rin itong dead on arrival sa ospital.
Pinaghahanap na ngayon ang tumakas na suspek na kinilalang si Tito Atilano, residente ng Barangay Pato-o.
