Pasado na sa konseho ng Odiongan ang ordinansang nag-uutos sa pagtatatag ng Information and Reading Centers sa lahat ng Barangay sa bayan alinsunod sa Republic Act 7743 na isinabatas pa noong 1994.
Ang Odiongna Municipal Public Library Ordinance of 2022 na inakda ni SB Kaila Yap ay naglalayong masiguro na may malapit na library o reading centers sa publiko para mabawasan ang illiteray sa bayan.
Inatasan ng ordinansa ang Sangguniang Barangay at Sangguniang Kabataan na maglaan ng pondo para sa mas maayos na pagpapatakbo ng Barangay Libraries o Information and Reading Centers.
Kasabay nito ang pagbuo ng Barangay Library Boards na pamumunuan ng mga Kapitan ng Barangay katuwang ang iba't ibang grupo sa barangay.
May parehong kautusan rin sa ordinansa na nag-aatas rin sa Lokal na Pamahalaan na bumuo ng Municipal Library Board na pamumunuan naman ng Bise Alkalde.
Trabaho ng Municipal at Barangay Library Board na masigurong naipatutupad ang implementing rules and regulations ng Republic Act 7743 kagaya ng pagsilbi bilang advisory committee at paggawa ng regulasyon sa pagpapatakbo ng mga libraries.
Sa nasabing ordinansa ay ipinag-uutos na rin ang pagbibigay ng Library ID card na nagkakahalaga ng P20 hanggang P300.
