Ipagpapatuloy ng administrasyon ni reelectionist Mayor Trina Firmalo-Fabic ang pagiging transparent ng lokal na pamahalaan ng Odiongan pagdating sa mga government infrastructure projects ng LGU kung sakaling muling maupo sa kanyang huling termino bilang alkalde ng bayan.
Sa ginanap ng Local Candidates Forum 2022 sa Odiongan na dinaluhan ng alkalde, naitanong sa kanya kung ano pa ang magagawa ng LGU para mas magkaroon ng transparency at accountability sa paghawak ng mga proyektong pang-imprasktatura ng gobyerno.
Ayon sa alkalde, ipagpapatuloy ng administrasyon ang mga programang kanilang nasimulan na para mas maging transparent pa ang lokal na pamahalaan ng Odiongan sa mga proyekto nito.
“Nasimulan na po natin yan sa nakaraang mga taon, para ma-improve ang ating transparency pagdating sa mga gov't infra projects, itinalaga natin ang Odiongan Public Information para po maipost [sa social media] ang ating mga proyekto,” pahayag ng alkalde.
“Regularly makikita niyo po na pinopost natin ang mga infra projects natin, nakalagay ang mga halaga at iba pang detalye. Meron rin po tayong assurance na lahat ng billboard sa mga proyekto natin ay nakalagay,” dagdag pa nito.
Kung sakaling mahalal muli, sinabi ng alkalde na posibleng i-live sa social media ang mga ginagawang bidding ng proyekto para makita ng publiko ang malinis na transaksyon kapag nagkakaroon ng bidding.
“Sa mga susunod na taon, pwede nating i-live ang mga bids kung kinakailangan. Pwede tayong magkaroon ng hotline para ang mga tao kung may nakikitang kailangang ipa-inspeksyon at pa-imbestigahan sa ating mga infra projects ay pwede silang magkontak sa hotline o mag-reach out para makita po natin ang nagiging problema kung meron man,” sinabi ni Fabic.
“We assure you that we are really committed to good governance and transparency,” paniniguro ng alkalde sa publiko.
Maaalalang, meron na ring Freedom of Information (FOI) ordinance sa bayan ng Odiongan na naipasa rin sa termino ni Fabic kung saan ang publiko ay maaring makahingi ng mga kopya ng mga dokumento ng gobyerno na kailangan nila.
