Hindi na mauulit ang malalaking eskandalo ng korapsyon sa gobyerno tulad ng nangyaring paggamit sa mga non-government organization (NGO) para makapagnakaw mula sa pondo ng pamahalaan na matatandaang kinasangkutan ng negosyanteng si Janet Lim-Napoles.
Ito ang binigyang-diin ni presidential candidate Panfilo ‘Ping’ Lacson sa kanyang pagharap sa mga residente ng Antipolo City, Rizal nitong Biyernes (Abril 22). Aniya, hindi niya pahihintulutan na magamit muli ang mga pribadong NGO alinsunod sa itinakda ng mga kasalukuyang batas.
Natalakay ni Lacson ang isyung ito sa ginanap na town hall meeting sa Ynares Center kung saan isa sa mga kalahok mula sa sektor ng kabataan ang nagtanong kung posible silang makatanggap ng pinansyal na suporta mula sa gobyerno para kanilang mga proyekto sa komunidad.
“Baka hindi ma-justify ‘yung pondo ng gobyerno papunta sa isang NGO. Alam niyo diyan maraming naimbestigahan noong si Napoles nagkaroon ng kaso kasi ginamit nila private na NGO,” diretsahang tugon ni Lacson sa tanong ng isang nagpakilalang miyembro ng Phase 2B Youth Movement na naka-base sa San Luis, Antipolo City.
Tinagurian si Napoles bilang ‘pork barrel queen’ dahil sa diumano’y pagiging utak niya sa P10-bilyong Priority Development Assistance Fund (PDAF) scam na kinasangkutan din ng ilang pulitiko. Nananatili siyang nakakulong matapos mahatulan ng Sandiganbayan na guilty sa mga kaso ng plunder, graft at malversation of public funds.
“Mahirap, kasi public funds, hindi pwedeng lumipat ito sa isang private organization. Kami po nagiging matapat sa inyo. Madali lang sabihin, ‘sige, gagawin natin.’ Pero kung alam naman nating hindi pwede at labag sa batas kasi baka hindi pumasa sa COA (Commission on Audit),” paliwanag ni Lacson.
Sa halip, ipinakilala ni Lacson ang panukala niyang paid internship program na kasama sa kanyang mga plataporma para sa mga mahihirap na kabataang nais maipagpatuloy ang kanilang edukasyon habang sumusuporta sa kanilang mga pamilya.
Aniya, sa ganitong paraan matutulungan din ang mga kabataan na naghahanda para sa kanilang mga napiling propesyon na magkaroon ng sapat na karanasan at mapahusay ang kanilang mga kakayahan sa iba’t ibang larangan sa pribado man o pampublikong sektor.
“Pwede kayong tanggapin sa mga pribadong tanggapan o kaya sa government offices. Ang tawag doon paid internship program. Habang kayo nag-aaral, parang nag-i-internship na kayo pero may sweldo, may allowance. ‘Yon po ‘yung pwede nating gawin. Pero sa isang private NGO para suportahan ng public funds medyo mahirap po ‘yon,” sabi ni Lacson.
Pinayuhan din ni Lacson ang dumulog na youth leader na maaari silang makipag-ugnayan sa malalaking pribadong korporasyon na mayroong mga ipinatutupad na corporate social responsibility projects upang makakalap ng pinansyal na suporta.
Dagdag niya, ang mga ganitong kasunduan ay pinahihintulutan ng mga umiiral na batas at kasalukuyan nang ginagawa ng mga organisasyon katulad ng Ayala Foundation at SM Foundation.
“Kailangan lamang gumawa kayo ng isang request, at kung accredited ang inyong NGO, pwede ‘yan—private-to-private. Ino-authorize ‘yan kasi ang kanila namang benefit, kapag sila’y gumastos ng kanilang corporate social responsibility (activities), tax-free ‘yon. Hindi sila sisingilin, parang tax deductible,” ayon sa senador.
Dagdag pa ng presidential candidate, ang tanging paraan para mabigyan ng pondo ng gobyerno ang mga NGO ay kung ipapaubaya nito ang kanilang mga mungkahing proyekto sa mga ahensya ng gobyerno sa pamamagitan ng isang memorandum of agreement (MOA) upang sila na ang magpatupad nito. Ngunit iginiit niya na ang mismong paghiling ng pondo mula sa buwis ng taumbayan para dalhin sa proyekto ng mga NGO ay hindi naaayon sa batas.
“Mag-mo-MOA para i-co-course ‘yung budget through that national agency, tapos ‘yung national agency ang magsasagawa ‘nung kung ano man ‘yung proyekto ninyo, pero hindi pwedeng ma-transfer ‘yung pondo papunta sa inyong NGO. Pero ‘yung project pwedeng isagawa ‘nung national agency, ang makikinabang ‘yung proyekto ng NGO na pinili ninyo. ‘Yan po ‘yung pwedeng procedure,” saad ni Lacson.
