Wala pa sa ngayong lugar sa lalawigan ng Romblon na itinuturing ng Commission on Elections (COMELEC) at ng Philippine National Police na ‘election hotspot’ ngayong Election 2022.
Ito ang ibinahagi ni Provincial Election Supervisor Atty. Supervisor Grollen Mar Liwag sa ginanap na Kapihan sa PIA Romblon nitong ika-17 ng Pebrero.
Ayon kay Atty. Liwag, nakipagpulong na ito sa Romblon Police Provincial Office at ibinalita sa kanya na walang binabantayang lugar sa lalawigan na mataas ang tsansa ng gulo dahil sa eleksyon.
“Wala naman po silang [Philippine Army and Philippine National Police] na declare na election hotspot so far, even wala din namang highly contested na political rivalries rito,” pahayag ni Atty. Liwag.
Dagdag pa ni Atty. Liwag, tuloy-tuloy ang ugnayan nila ng Philippine Army at ng Romblon Police Provincial Office upang masigurong ligtas ang halalan ngayong taon.
HINDI KAILANGAN NG BAKUNA SA PAGBOTO
Samantala, dahil ang halalan ngayong taon ay gaganapin sa gitna ng nararanasang pandemya ng bansa, sinabi ni Atty. Liwag na hindi kailangan ng isang Pilipino ang bakuna o vaccination card para makapag-boto sa darating na halalan.
Aniya, ang pagiging rehistradong botante sa bansa ay sapat na para payagang bomoto ng kanilang gustong ihalalal sa isang posisyon.
Pero para masiguro umano ang kaligtasan ng mga botante sa darating na araw ng botohan, maglalatag umano ng mga thermal scanners sa labas ng mga election precincts o di kaya ay sa mga labas ng paaralan para masiguro na lahat ng pumapasok rito ay walang sintomas ng Covid-19.
Kung sakaling may lagnat ang botante, may isolation room umanong pwedeng pagdalhan sa kanila kung saan sila makakapagboto.
BAWAL SA MGA PUNO
Muli namang nagpaalala si Atty. Grollen Mar Liwag sa mga kandidato na dapat sa mga identified na common poster areas lamang pwedeng maglagay ng kanilang mga election paraphernalia at hindi sa mga puno, o sa mga lugar na hindi pinayagan ng Comelec.
Dapat rin umanong siguraduhin ng mga kandidato na nasusunod ang sukat na itinakda ng Comelec.
