Pormal nang umupo bilang ika-17 Regional Director ng Police Regional Office Mimaropa si PBGen Sidney Sultan Hernia.
Si Hernia ang papalit kay PBGen Nelson Bermudez Bondoc na nakatakdang magretiro ngayong buwan sa ginanap na paglipat ng tungkulin sa Camp Efigenio C Navarro sa lungsod na ito kamakailan.
Sa talumpati ng pagtanggap ng bagong direktor, kanyang sinabi na “paiigtingin ko ang intensified cleanliness policy ng kapulisan sa rehiyon upang masiguro ko na malinis ang hanay ng tagapangalaga ng kaayusan at katahimikan sa 71 munisipalidad at dalawang lungsod at umaasa ako sa buong suporta at pakikiisa ng kapulisan ng PRO Mimaropa.”
Bukod dito, paghahandaan din aniya ng tanggapan ang nalalapit na halalan sa Mayo 9 na pormal nang magsisimula ang panahon ng eleksiyon sa pamamagitan ng pagpapatupad ng gun ban sa Enero 9 hanggang Hunyo 8, at ang pagtatalaga ng mga checkpoint at chokepoint sa mga istratihikong lugar sa pamamagitan ng Oplan Bakal/Oplan Sita, lalo na sa mga itinuturing na ‘areas of immediate concern.’
Dagdag pa ni Hernia, “mahigpit naming lalabanan ang kriminalidad, mga nagbebenta ng iligal na droga, insurhensiya pati na ang pagsawata sa mga gumagalang motorcycle riding criminals.”
Sa pagtatapos ng mensahe, sinabi ng bagong direktor na ang kanilang mandato ay pangalagaan at paglingkuran ang taongbayan, respetuhin ang kanilang karapatan at idaan sa tamang proseso sakaling nagkasala sa batas dahil aniya ay “tao rin sila tulad ng pulis”.
Si Hernia ay tubong Polomolok South Cotabato Mindanao at nagtapos sa Philippine Military Academy (PMA) Tanglaw Diwa Class '92. Bago itinalaga sa PRO Mimaropa, siya ay naglingkod bilang direktor ng PNP Retirement Benefits and Pension Services at Executive Officer ng Directorate for Plans sa Camp Crame.
Dumalo din sa naturang okasyon si PLtGen Ferdinand O Divina, Director, Directorate for Integrated Police Operations na nakatalaga sa timog Luzon na kumatawan kay Police Director General Dionardo B Carlos na nangasiwa sa pagsasalin ng tungkulin at si City Mayor Arnan Panaligan at Provincial Administrator Dr Hubbert Christopher Dolor bilang mga panauhing pandanagal. (DN/PIA-OrMin)
