Inihayag ni Partido Reporma chairman at standard-bearer Panfilo “Ping” Lacson na posible sana ang kanyang pagsuporta kay Vice President Maria Leonor “Leni” Robredo sa ilalim ng united opposition ticket kung naging tapat lamang ito sa kanya at sa publiko tungkol sa pagnanais niya na maging pangulo.
Isiniwalat ito ni Lacson sa panayam ng DZMM Teleradyo nitong Miyerkules upang matigil na ang usap-usapan tungkol sa mga nakaraang pagpupulong para sa unification o pag-iisa ng oposisyon para sa Halalan 2022 na sinimulan ni Robredo sa tambalang Lacson at Senate President Vicente ‘Tito’ Sotto III.
Ayon kay Lacson, nagkaroon na ng kasunduan ang tambalan nila ni Sotto sa kanilang mga tagasuporta bago pa man lumapit si Robredo at Senate Minority Floor Leader Franklin Drilon upang ipanukala ang konsepto ng unification na kalaunan ay naging negosasyon para sa sariling presidential bid ng bise presidente.
“‘Nung nag-usap kaming dalawa, nandiyan, nakaharap si Senate President, alam mo, prinesent niya (Robredo) sa akin ‘yung konsepto na mag-unify. Sabi ko, why not? So, talagang sumagi sa isip ko na talagang kung magkakaisa, mas may puwersa,” ani Lacson.
Matatandaan na bago pa man ianunsyo ni Robredo na kakandidato siya para sa pagkapangulo ay nauna nang nagdeklara ng kanilang intensyon para tumakbo sa dalawang pinakamataas na katungkulan sa gobyerno ang Lacson-Sotto tandem.
Sa puntong ito, sinabi ni Lacson na wala nang atrasan ang kanilang kandidatura dahil naianunsyo na nila ito sa publiko. Kaya naman iminungkahi niya na kung magpapasya si Robredo na tumakbo sa pagkapangulo ay magiging ‘common candidate’ nila si Sotto.
Pagbubunyag ni Lacson, “Ang sagot niya sa akin ‘hindi pwede…’ So doon sumagi sa isipan ko hindi unification ang usapan. Unification sa ilalim ng isang kandidato na naghahangad at ‘yung kandidatong ‘yon siya ‘yon. ‘Yon, doon ako medyo nadismaya.”
Sabi ni Lacson, sa ilalim ng kanyang panukalang unification ay maitutuloy pa rin niya ang kanyang pangako sa mga tagasuporta niya habang nakabukas ang pinto para kay Robredo sakaling magdesisyon na itong tumakbo, gayunman tinanggihan umano ito ng bise presidente.
“Ang ginawa niyang dahilan ‘yung sarili niyang experience na ‘nung nag-file daw siya ng certificate of candidacy [at] umatras siya, may mga bumoto pa rin daw sa kanya, nasayang ‘yung boto. Pero noong nagpaliwanag siya, sabi niya siya raw kasi kapag nag-file na, hinding-hindi na siya aatras,” ani Lacson.
Dagdag niya, “Sabi ko parang inconsistent ‘yung aming napag-usapan [sa] sinasabi niya sa publiko. I’m sorry, but I will have to tell the people since tinanong niyo sa akin dahil maraming lumalabas sa mga troll, ano, na ako ‘yung sumisira sa unification—no.”
“Gusto ko nga matuloy pero sa kongkretong pamamaraan, hindi sa usapang konsepto, hindi sa usapang walang kahihinatnan… Kasi kung pumayag siya sana sa ganoong idea, siguro meron talagang pagkakataon na mag-unify ‘yung tinatawag nating hindi pro-administration na mga kandidato. But I’m sorry to tell this, ‘yun ang nagtapos,” sabi pa ni Lacson.
Sina Robredo at Drilon ay kapwa nasa ilalim ng Liberal Party, habang si Sotto ay chairman ng Nationalist People’s Coalition (NPC) na nakipag-alyansa sa Partido Reporma para itulak ang Lacson-Sotto tandem.
Suportado rin sina Lacson at Sotto ng National Unity Party na pinamumunuan ni dating Interior Secretary Ronaldo Puno, na kanilang campaign manager. Tumatakbo rin bilang senatorial aspirant sa ilalim ng Partido Reporma sina health advocate Dr. Minguita Padilla, dating police chief Guillermo Eleazar, at dating Makati congressman Monsour del Rosario.
