Dahil sa kasalukuyang sitwasyon ng pandemya sa bansa at nababaon sa utang ang mamamayan tulad halimbawa na lang ng emergency loan, ipatutupad ng Social Security System (SSS), ang Penalty Condonation Program o Pandemic Relief and Restructuring Program (PRRP) na siyang magpapagaan sa mga bayarin sa naturang tanggapan.
Sinabi ni SSS Senior Vice President Pedro Baoy “ito na ang pagkakataon ng ating mga miyembro na mabayaran ng buo ang mga loan para hindi na madagdagan pa ng ilang penalties at interest ang kanilang babayaran,” sa pamamagitan ng virtual press conference na dinaluhan kamakailan ng humigit-kumulang 100 mamamahayag sa buong bansa,
Sa ilalim anya ng PRRP, hindi na kailangan pang bayaran ang mga naipong penalty sa mga hindi na mabayarang short term loan gaya ng salary loan, calamity at emergency loan gayundin ang housing loan at restructured loan sa mga taong 2016-2019. Principal at interes na lamang ang kailangan bayaran.
Maari na din mag one-time full-payment o kaya ay kalahati ng halagang inutang habang ang natitirang 50% ay pwedeng bayaran sa loob ng anim hanggang 12 buwan.
Sakop rin ng programa ang mga employer at household na hindi makapaghulog ng kontribusyon sa kanilang mga empleyado dahil sa problemang pinansiyal na kinakaharap.
Samantala, ayon naman kay Atty. Stella Berna Valentona-Inacay, SSS Department Manager at ng NCR South Legal Dept., “kailaangan na maghulog kahit 5% ng kabuuang halaga ng inutang na delingkwente at nasa long term payment. Dati, kailangang bayaran sa loob ng 48 buwan, ngayon ay 60 buwan na.”
Dagdag pa ni Inacay, maari aniya itong i-apply ng mga kwalipikadong kasapi mula 2021 hanggang 2022. Ang Pandemic Relief and Restructuring Program ay ipatutupad ng SSS simula ngayong buwan hanggang ikatlong linggo ng Pebrero 2022.
Nagpaalala din si SSS Calapan City Branch Manager Imelda Familaran na bukas ang kanilang tanggapan para sa mga nagnanais magbayad ng kanilang loan. (DN/PIA-OrMin)
