Sa kulungan ang diretso ng isang lalaki sa bayan ng Calatrava, Romblon matapos itong ireklamo ng kapitan ng Barangay Linao sa pulisya dahil sa panununtok nito nitong October 31.
Ayon sa imbestigasyon ng Calatrava Municipal Police Station bandang 4:30 ng hapon nang magwala umano ang lasing na binatang si Dexter Manzo Yaon, 21, malapit sa isang tindahan.
Lumabas umano si kapitan matapos makarinig ng mga nababasag na bote at marinig ang sigaw ng suspek na “Mga tsismosa kayo, lumabas kayo diyan”.
Ayon kay Kapitan Johnny Paz Mirabete, 56, lumapit siya kay Yaon para sitahin sana ito ngunit sinuntok siya ng suspek na tumama sa kanyang mata at labi.
Dumating naman sa lugar si Kagawad Marnie Fajutnao na umawat sa suspek at tumulong upang magsumbong sa mga kapulisan.
Nakakulong na ngayon ang suspek at mahaharap sa kasong Direct Assault Upon an Agent of Person in Authority.
