Isinailalim simula kaninang umaga sa total lockdown ng lokal na pamahalaan ng Santa Maria ang kanilang buong bayan kasunod na maitala sa lugar ang kanilang una at pangalawang kaso ng Covid-19.
Sa Executive Order No. 029-2020 ni Mayor Lorilie M. Fabon, sinabi rito na tanging 5 kada-barangay ang maari lamang pumunta sa ibang bayan para gumawa ng transaksyon.
Ipatitigil rin muna ang pagpapauwi sa mga Returning Overseas Filipinos (ROFs) at Locally Stranded Individuals (LSIs).
Magpapatupad rin ng curfew sa lugar kung saan magsisimula ng alas-8 ng gabi hanggang alas-5 ng umaga kinabukasan.
Inatasan rin ng pamahalaang lokal ang Philippine Nationa Police na maglatag mula ng quarantine checkpoints at magpatupad ng quarantine passes.
Tigil rin muna pansamantala ang mga aktibidad patungkol sa construction sa lugar.
Magtatagal ang nasabing lockdown hanggang sa lumabas ang resulta ng isinagawang contact tracing ng LGU Santa Maria.
Matatandaang noong Sabado, inanunsyo ng Rural Health Unit ng Santa Maria na dalawang LSI ang nagpositibo sa covid-19, ito ay isang babae na 46 taong gulang at isang anim (6) na buwang sanggol.
Naka-isolate na sila sa ngayon sa isang isolation facility ng bayan. (PJF)
