MANILA, Philippines — Hindi na kailangan ang ‘independent investigation para sa diumano’y ‘overpriced’ personal protective equipment (PPEs) na binili ng DOH upang protektahan ang mga healthcare workers sa pagkakahawa sa coronavirus, ayon sa Malacañang nitong Martes, 26 May 2020.
Ito’y matapos depensahan ni Pangulong Duterte si Health Secretary Francisco Duque III sa kanyang public address nitong Lunes ng gabi. Sinabi ng Pangulo na sya mismo ang nag-utos upang pabilisin ang pagbili sa mga PPEs anupaman ang presyo nito.
“Naging malinaw naman at nagbigay din ng opinyon ang mga pribadong mga doktor na talagang wala pong irregularity, walang overpriced kasi set po ‘yan,” ayon kay presidential spokesperson Harry Roque sa ginanap nitong televised Palace briefing.
“Dalawang PPE nga po kasama diyan, kasama pa yung goggles, kasama pa yung sa paa. So wala pong kwestiyon sa PPE,” dagdag pa ni Spox Roque.
Nitong pagpupulong mga ilang mga opisyal sa Malacañang nitong Lunes ng gabi, ipinakita ni Budget Undersecretary Lloyd Christopher Lao ang kompletong set ng PPEs na binili ng gobyerno para sa mga medical frontliners. Aniya, ang mga nabiling protective equipment ay alinsunod naman sa local at international standards.
Ayon pa kay USec Lao, ang pinakamahal sa nasabing PPE set ay ang ‘Ebola-type’ coverall, na nagkakahalaga ng P1,100 kumpara sa mga gawang lokal na suits na nagkakahalaga ng P850 lamang. Ang coverall ay pinapaniwalaan na kayang hadlangan ang airborne na viruses.
Ganun pa man, inutusan ni Pangulong Duterte ang NBI na imbestigahan ang umano’y dalawa na nagtangkang magbenta ng overpriced medical equipment sa gobyerno na nagkakahalaga ng tatlong tupi ng presyo ng manufacturer nito.
“Ang pinapaimbestigahan po ‘yung mga extraction machines at mga test kits dahil karamihan po dito lalong lalo na yung test kits galing lang po sa isang kumpanya sa Tsina at iba-iba lang po ang presyo depende kung sino nagbenta. So yun po ang pinaimbestigahan ni Presidente,” ayon kay Roque.
Matatandaang inalerto ni Senator Panfilo Lacson ang umanoy overpricing ng COVID-19 test kits. Ayon sa knya, ang automated extraction machine mula sa manufacturer na Sansure Biotech ay nagkakahalaga lamang ng P1.75 million subalit ang binili ng gobyerno ay nasa halagang P4 million bawat unit.
Subalit depensa ni Lao, mas pinili ng gobyerno na bumili sa Hongkong-based corporation na distributor din ng Sansure equipment.
Tinukoy ni Roque ang umanoy ‘dalawa’ na maaring mapanagot sa ilalim ng Anti-Profiteering Law at Bayanihan Act.
Binigyan ni Duterte ang NBI ng tatlong araw upang maibestigahan ang nasabing alegasyon at magsumite ng ulat nito sa publiko.