Dahil sa kakulangan ng supply ng personal protective equipment sa lalawigan ng Romblon, para-paraan nalang ang ilang ospital para magkaroon ng protective equipment para ligtas sila kung sakaling may pasyenteng mag papatingin na taglay ang sintomas ng Covid-19.
Sa ISIAH Hospital & Medical Center, ginamit nalang ng mga staff rito ang kapote bilang PPE para pag may magpatingin na pasyente na may ubo, sipon, at lagnat ay masisiguro nila ang kanilang kaligtasan.
Sa panayam ng Romblon News Network kay Vice Mayor Dimaala, sinabi nito na wala kasi umanong makunan ng PPE sa probinsya dahil sa pagtigil ng biyahe ng mga barko.
“Baka lumala ang sitwasyon ng covid, kaya nag-improvised po ako ng gagamitin naming PPE. Ang sumagi sa isip ko po ay kapote, tapos bumili po ako ng kapote mga 20 piraso at yung lagayan po ng tubig ay binutasan ko at sinukat sa ulo at kasya naman,” ayon kay Dimaala.
“Ito lang ay paghahanda natin kasi hindi natin inaasahan yung sitwasyon natin sa probinsya, para matanggap namin yung mga pasyente kung sakaling lumala itong sitwasyon ng covid,” dagdag nito.
Nitong mga nakaraang araw ay pansamantala munang hindi sila tumanggap ng pasyenteng may ubo, sipon at lagnat dahil sa kawalan ng PPE ang mga kakausap sa kanila.
Ngayon, may ginawa na umano silang triage kung saan doon dadalhin ang mga pasyente at dun sila kakausapin.
Aniya, bumili na rin umano sila sa Manila ng mga PPE ngunit hindi pa sigurado kung kelan ito dadating dahil tumigil ang biyahe ng mga barko, at trucking dahil sa umiiral na enhanced community quarantine.
Halos ganun rin ang ginagawa sa ilang ospital sa lalawigan ng Romblon kung saan nag-improvised sila ng mga masks pangharang sa kanilang mga mukha.
Ayon sa Department of Health – Mimaropa, nagpadala na sila ng karagdagang supply sa lalawigan ng Romblon kagaya ng 50 sets ng PPE, 40 boxes ng surgical masks, at may 260 na N95 masks.
