Sugatan ang dalawang sakay ng isang motorsiklo matapos nilang makasagian ang isang truck sa kahabaan ng national road sa Barangay Gunihayaan, Looc, Romblon nitong Martes, March 03.
Ayon sa mga saksi sa aksidente, bandang 4:30 ng hapon nang mangyari ang aksidente. Parehong patungo umano sana ang dalawang sasakyan sa bayan ng Santa Fe nang maaksidente.
Maswerte naman umanong may dumaan agad na ambulansya na nagdala sa dalawang rider sa Don Modesto Formilleza Sr. Memorial Hospital sa Barangay Punta.
Sa panayam ng Romblon News Network sa Looc Municipal Police Station, nagkasundo na umano ang dalawang partido na hindi na magsasampa ng kaso at mag-uusap nalang sila sa barangay.
Patuloy na nagpapagaling ang dalawang rider sa ospital.
