Patay ang isang rider sa bayan ng San Andres, Romblon matapos masangkot ito sa salpukan ng dalawang motorsiklo sa kahabaan ng Tablas Circumferential Rd. sa bahagi ng Barangay Mabini nitong gabi ng Sabado, February 22.
Kinilala ang nasawi na si Lando Bautista, residente ng parehong bayan.
Ayon sa imbestigasyon ng pulisya, matulin ang patakbo ng magka-angkas na rider na sina Sonny Boy Famadulan, at Xander Famadulan sa national road nang bigla nilang masalpok ang kasalubong nila na si Bautista, dahilan upang matumba at mauntog sa kalsada.
Samantala, sumalpok naman sa concrete barrier ang sinasakyan ng dalawang Famadulan.
Isinugod naman agad sa Romblon Provincial Hospital ang dalawang Famadulan matapos magtamo ng sugat sa iba’t ibang bahagi ng katawan at bali sa paa.
Tinitingnan ng otoridad ang posibilidad na nakainum ang dalawang Famadulan nang mangyari ang aksidente. Wala ring suot na helmet ang tatlo.
