Nakahandusay at wala ng buhay ng maabutan ng mga tauhan ng Calatrava Municipal Police Station ang isang lalaki matapos itong pagsasaksakin ng kanyang kainuman nitong gabi ng Linggo sa bayan ng Calatrava, Romblon.
Kinilala ng Romblon Police Provincial Office ang biktima na si Demetrio Falcunit Gadon, 37, habang ang suspek ay kinilala namang si Ronald Falculan Falcutila, 40, pawang mga residente ng Barangay Pangulo.
Ayon sa imbestigasyon ng pulisya, nasa inuman sa isang selebrasyon ang dalawa nang magkayayain na uuwi para kumain ngunit sinipa umano ng biktima ang pintuan ng bahay ng suspek dahilan upang masira ito.
Nagalit ang suspek hanggang sa makakita ito ng kitchen knife at pinagsasaksak ang biktima sa dibdib.
Nagtamo ng apat na saksak ang biktima dahilan ng kanyang agarang pagkamatay.
Agad namang sumuko si Falcutila kay PSMS Romeo Fruelda ng Calatrava MPS at agad na isinumbong ang nangyari.
Narekober sa tabing ilog ang ginamit na patalim na suspek na tinatayang may habang nasa 19 cm.
Nakakulong na ang suspek at nahaharap sa kasong murder.
