Nailigtas ng mga tauhan ng Philippine Coast Guard, Santa Fe Municipal Police Station kasama ang mga tauhan ng Municipal Disaster Risk Reduction and Management Office ng Santa Fe ang walong mag-anak na sakay ng isang lumubog na bangka sa dagat na bahagi ng Barangay Guintigbasan, Santa Fe, Romblon pasado alas-10 kaninang umaga.
Kinilala ni PO3 Mar Servañez ng Coast Guard Station – Santa Fe, ang mga nailigtas na sina Edgar Del Mundo Zacarias, Shirlyn Casimero Zacarias, Eisa Jane Zacarias, Eriberto Zacarias, Razon Casimero Amigos, Christine Mendoza Casimero, Cecile Casimero Sim, at Jojo Casimero Sim.
Ayon sa boat captain na si Edgar Del Mundo Zacarias, umalis sila ng Carabao Island at patungo sanang Alcantara, Romblon nang bayuhin sila ng malalakas na alon dahilan upang pasukin ng tubig ang kanilang bangka hanggang sa lumubog. Agad na lumangoy si Zacarias patungong tabing dagat para maghanap ng tutulong sa kanila.
Ligtas na ngayon ang walo at kasalukuyang nanatali sa kanilang mga kamag-anak sa bayan ng Santa Fe.
