Isang simposium patungkol sa human immunodeficiency viruses (HIV) at acquired immunodeficiency syndrome (AIDS) ang inorganisa sa bayang ito ng Department of Health – Romblon (DOH-Romblon), Provincial Health Office (PHO), Romblon State University (RSU), at ng RSU Bayangaw nitong ika-28 ng Nobyembre bilang pakikiisa nila sa World AIDS Day celebration sa darating na ika-1 ng Disyembre.
Dinaluhan ito ng mahigit 150 na estudyante ng RSU Main Campus, mga kawani ng DOH at PHO, BJMP, at mga bisita mula sa pribadong sektor sa Odiongan.
Layunin ng simposium na mabuksan ang kamalayan ng mga estudyante patungkol sa sakit na HIV at AIDS lalo na kung paano ito maiiwasan.
Ayon sa panauhing pandangal sa simposium na si Jhay Ar Del Rosario, isang HIV advocate, ang sakit na HIV ay naililipat lamang umano sa pamamagitan ng pagtatalik o di kaya ay kapag may nangyaring blood transfusion kaya ang pinakamabisa parin umanong paraan para maiwasan ito ay ang pakikipagtalik lamang sa kanilang partner, o pagiging tapat sa asawa.
Hinikayat rin ni Del Rosario ang mga dumalong estudyante na maging advocate rin nila ang pagtulong para matigil na ang stigma at discrimination sa mga PLHIV o People Living with HIV dahil sila ay mga tao rin at hindi naiiba sa publiko.
Matapos ang simposium, aabot sa 50 na estudyante ang kusang loob na nagpakuha ng dugo para isalang sa HIV Testing.
Naglagay rin ng handmark ang mga mga dumalo sa isang pledge of commitment na nagsasabing kaisa sila sa pagtulong para mabawasan o di kaya ay maitigil na ang stigma at discrimination sa mga PLHIV.
