Nangako ang mga alkalde sa probinsya ng Romblon ng kanilang suporta para bigyan ng proteksyon ang mga protective areas sa probinsya katulad ng Mt. Guiting-guiting Natural Park (MGGNP) sa Sibuyan Island at ang CALSANAG Watershed Forest Reserve (CWFR) sa Tablas Island.
Sa ginanap na Protected Area Management Board (PAMB) Meetings sa Sibuyan noong October 29, at sa Tablas noong October 31, pinuri ni Department of Environment and Natural Resources MIMAROPA Regional Executive Director Henry A. Adornado ang mahigpit na pakikipagtulungan ng Protected Area Management Office (PAMO) at ng mga lokal stakeholders sa pangangalaga sa mga nabanggit na protected areas.
“Such cooperation reflects that the communities within MGGNP and CWFR demonstrate high level of consciousness on the importance of protected areas, as well as the benefits derived from the continued preservation of these ecosystems,” ayon kay Adornado.
Ang Mount Guiting-guiting Natural Park sa Sibuyan ay may kabuoang sukat na 15,512.22 hectares at nasasakupan ng tatlong bayan. Dahil dito lumagda at nangako ang mga alkalde ng mga bayan ng Cajidiocan, San Fernando, at Magdiwang, na magbibigay sila ng P500,000 kada munisipyo kada taon para sa pangangalaga ng Mt. Guiting-guiting Natural Park.
Malaking tulong umano ito sa para makakuha ng forest guards, pagpatraining ng mga tour guides, at iba pa.
Samantala, sa bayan naman ng Odiongan ginanap ang 4th quarter Protected Area Management Board meeting para sa CALSANAG Watershed Forest Reserve. Dinaluhan ito nina Congressman Eleandro Jesus Madrona, Board Member Robert Maulion, mga alkalde ng San Agustin, Calatrava, at San Andres; at ni Romblon State University (RSU) President Arnulfo de Luna.
Dumalo rin sa nasabing pagpupulong ang mga stakeholders magmula sa PNP, BFP, at iba pang sektor na may kaugnayan sa pangangalaga ng CALSANAG Watershed.
Base sa pagsisiyasat, ang CALSANAG Watershed ay bahay ng iba't ibang threatened species ng ibon, at iba pang flora and fauna.
Sa ngayon, ang CALSANAG Watershed ay nasa proseso na para ideklarang protected area sa pamamgitan ng isang presidential proclamation at congressional enactment.
