Patay ang isang lalaki sa bayan ng Looc, Romblon matapos mapalo ng 2×2 na kahoy at mataga sa batok nitong gabi ng November 1.
Sa report mula sa Looc Municipal Police Station, bandang alas-11 ng gabi ng pumunta ang mag-anak na sina Nick Gregorio, Johnny Gregorio, at Analyn Gregorio sa bahay ng mag-asawang biktima na sina Rizalito Pastor at Rosalina Pastor dala ang isang bolo, at isang 2×2 na kahoy.
Nagkaroon umano ng pagtatalo sa dalawang kampo hanggang sa hamunin ni Analyn ng bolo fight si Rosalina.
Habang ang isa naman umano sa mga suspek na si Nick, biglang pinailawan sa mukha ng dala niyang flashlight ang biktimang si Rizalito dahilan upang hindi ito makakita.
Habang hindi nakakita, lumapit si Johnny at agad na pinalo ang biktima ng 2×2 sa kanyang leeg dahilan upang ito'y matumba. Kasunod nito ay ang paglapit naman ni Nick, at pagtaga sa batok ng biktima dahilan ng kanyang kamatayan.
Matapos namang mataga ang biktimang lalaki, tinaga naman ng isa sa mga suspek si Rosalina sa ulo.
Agad na isinugod ang mga biktima sa Don Modesto Formilleza Sr. Memorial Hospital ngunit idineklarang dead on arrival si Rizalito.
Inaresto naman ng mga rumespondeng pulis ang tatlong suspek ngunit hindi nakuha ang ginamit na patalim ng mga ito sa pananaga.
Sa imbestigasyon ng mga kapulisan, lumalabas na alitan sa lupa ang naging dahilan ng paglusob ng pamilya Gregorio na nauwi sa pananaga at pagkamatay ng biktima.
Mahaharap ang mga suspek sa kaukulang kaso.
