Inilahad ng Provincial Health Office ng lalawigan ng Romblon na nadagdagan ng sampu ang kabuoang bilang ng tinamaan ng sakit na human immunodeficiency viruses (HIV) sa lalawigan ng Romblon ngayong 2019.
Sa pahayag ni Dra. Ederlina Aguirre sa harap ng mga estudyante ng Romblon State University na dumalo sa isang simposium patungkol sa nasabing sakit nitong Huwebes, November 28, sinabi nito na mula 1988 hanggang June 2019 ay meron ng 51 na kaso ng HIV sa lalawigan.
Base pa sa datus ng Regional Epidemiology and Surveillance Unit (RESU) ng DOH-Mimaropa, 49 rito ay mga kalalakihan at tanging 2 lang ang babae.
Pinakamaraming kaso ay naitala sa bayan ng Odiongan at Romblon na pawang nakapagtala ng 13 na kaso mula 1988. Base rin sa datus ng RESU, pinakamarami umano na tinatamaan ng virus ay mga taong edad 25-34.
Samantala, sinabi rin sa datus ng RESU na 1 na rito ang naitalagang namatay mula 1988.
Isinisisi ni Dra. Aguirre ang pagdami ng kaso ng HIV sa bansa sa curiosity ng mga kabataan sa tinatawag na sex sa murang mga edad.
“Kung pag-aaralan ang data, mapapansin na dumadami ang kaso nating ng HIV. Sa anong dahilan? Kasi tumataas ang teenage pregnancy, at siguro dahil nagiging curious sila sa sex dahil nakikita at napapanood sa mga media. Sa cellphone yang sex nakikita mo na agad, hindi ganun dati,” ayon sa mensahe ni Dra. Aguirre.
Hinihikayat ni Dra. Aguirre ang publiko na ugaliing magpa-test every 6 months sa HIV/AIDS Treatment Hub o Red Shelter sa Romblon Provincial Hospital sa Odiongan dahil libre naman umano ito para masiguro na wala silang sakit.
